Objet du blog

Ce blog présente principalement des articles sur les actualités concernant les religions, la spiritualité protestante, la culture et la langue occitanes, l'actualité personnelle et familiale. On peut aussi s'y trouver quelques billets d'humeur...

Aquel blòg presenta principalament d'articles sus las actualitats pertocant las religions, l'espiritualitat protestanta, la cultura e la lenga occitanas, l'actualitat personala e familiala. Se pòdon trobar qualques mots bilhetas d'umor...

mardi 9 septembre 2014

LO CANAL DE RIQUET (2)



Contunhem lo viatge long del Canal de Riquet, granda via de transpòrt.
« * Las mèrças : La foncion primièra del canal de Riquet foguèt lo transpòrt de mèrças. Pendent mai de tres sègles, en mai de las cerealas e del vin, produccions emblematicas de la contrada, un fum de produits es adralhat per camin d’aiga.
Long dels temps, aquesta activitat coneis unas fortunas divèrsas. Los dos darnièrs batèus, lo Bacus e lo Dionisòs, arrestan d'anar e venir sul canal de Riquet en 1989.
* Fin de l'afret ? Benlèu pas ! : A l'ora d'ara, un moviment se fa jorn en França per promòure lo provesiment dels centres urbans per via fluviala : lo circuit cort fluvial. Unas gabarras embarcan « produits locals » fornits pel monde rural e los distribuisson long del camin.
* Entre los produits transportats :
- Lo vin : L'espelida del pòrt de Sèta a la fin del sègle 17 afavorís l’exportacion. Vin, muscat, blanqueta e aigardent seguisson lo canal de Riquet e se'n van cap a Italia, Espanha, Baltica o Euròpa del nòrd. Al sègle 19, la monocultura de la vinha senhoreja e lo canal permet de desservir un ensemble interregional de Bordèu a Marselha. Actualament, los vinhairons de las apellacions Corbièras, Menerbés, Sanch-Inhan o Cabardés utilizan pas brica lo canal pel transpòrt del vin mas prepausan tastas dels melhors tucs dins las cavas que marcan lo camin d'aiga.
- Las cerealas : Fa temps que Lauragués s'impausèt coma tèrra productritz de cerealas : los nombroses molins de vent farinièrs ne son una pròva bèla. Lo demai de blat pren lo camin de las contradas deficitàrias coma Lengadòc-bas o Provença. Lo canal arriba al moment que cal. Mai tard, los blats tradicionals e blats durs de Lauragués arriban fins als pòrts de Marselha e de Bordèus. Uèi, lo transpòrt se fa pas mai pel canal de Riquet, mas Lauragués contunha d'exportar via Pòrt la Novèla cap al bacin mediterranèu.
- Idrocarburs, engraisses : Dins un tot autre domeni, petròli, sofre, sabla, calç, pozzolana e plan d'autres materials per bastir son al sègle 20 las basas d'un trafec regulièr e pro ben significatiu qu'alimenta los pòrts locals.
- Lo marme de Caunas de Menerbés : Lo marme rosat de Caunas de Menerbés s'utilizèt pel Trianon e Versalha, l’arc de Trionfe del Carrossèl, l’Operà Garnièr a París. S'embarcava a Puèg-Eric, puèi seguissiá lo canal de Riquet, Garona e Seina (amb una ligason de mar entre Bordèu e Le Havre). Las peirièras de marme son totjorn en activitat.
- La sal : Cargada a Pòrt-la-Novèla o a Pòrt-Sant-Loís-de-Ròse, per arribar a Bordèus, la sal es principalament utilizada pels pescaires de merluça ; pas plan luènh de la Robina, las salinas de Grussan nos permeton de descobrir una produccion originala.
- L’arsenic : Mai estonant encara, lo pòrt de Carcassona recebiá d’arsenic, via lo canal de Riquet. Aqueste transpòrt èra ligat a l’expleitacion de las minas d’aur de Salsinha, uèi barradas. »
Gabarron Roch

Aucun commentaire:

Enregistrer un commentaire