Objet du blog

Ce blog présente principalement des articles sur les actualités concernant les religions, la spiritualité protestante, la culture et la langue occitanes, l'actualité personnelle et familiale. On peut aussi s'y trouver quelques billets d'humeur...

Aquel blòg presenta principalament d'articles sus las actualitats pertocant las religions, l'espiritualitat protestanta, la cultura e la lenga occitanas, l'actualitat personala e familiala. Se pòdon trobar qualques mots bilhetas d'umor...

mardi 9 septembre 2014

SEGA-LANA E LOS ORSES (3)




- Començarem aquesta cronica amb la fin de nòstra istòria entre Sega-Lana e los orses (una istòria qu'es pas prèsta de s'acabar) : « Al cap de nòu meses, la Ministra de l'Ecologia escapèt a l'Ors. Quand, de matin, se rendèt a son Ministèri per signar lo decret favorable a la reintroduccion de l'ors dins Pirenèus, del lop dins la Montanha negra e del molinièr a Cucunhan, li aprenguèron que fasiá temps qu'èra pas mai Ministra, qu'avián balhat son pòste al Monteborg mas qu'aqueste matin èra pas al burèu, vist qu'èra partit en Menerbés per l'estrena del primièr potz d'extraccion de gas de sistre de França e d'Euròpa.

La Sega-Lana soriguèt : aqueste ser, seriá tornarmai Ministra que lo Monteborg n'auriá per mesadas de tornar montar del fons del potz ont, per inadverténcia, un vinhairon-pilar del país l'auriá fait cabuçar !

Nòstre conte novèl se pòt pas acabar sus la formula rituala del « E cric e crac, mon conte es acabat », mas puslèu sus un crit, sòrres e faires, per que fasquèssetz bon profit d'aquesta parabòla ! »

- Un legeire, que se ditz Mickael Carn-d’Òsses (e que se presenta coma Conselhièr Cultural) atira nòstra atencion sus una autra actualitat de l'estiu present a Carcassona. Atal, nos escriu : « Aqueste mes de Julhet nos daissa pas alenar : entre la  Copa del Monde de Foot, lo Desfilat e lo Fòc d’Artifici del 14 de Julh, ara  es lo Torn de França que nos tomba dessús ambe sa  Caravana coma la  Virada del Cèrç ambe la granissada. Organizat per una societat que se ditz « Amaury Productions » (aquò s’inventa pas) ! B’auriá calgut recampar tot e  far d’aquelis tres « eveniments » un sol : un grand match de foot a bicicleta, ambe d’equipas  militàrias en unifòrme, de  fòcs d’artifici blau-blanc-roges e de drapèls franceses de pertot. Auriam poscut far aquò a l’estadi Domec de Carcassona ambe lo 3en RPIMA qu’arribariá sul tarrenc en paracasuda, atal los suportaires poirián bramar un cant d’adieu « Salut, Salut a Vous, braves pioupious du troisième, chacun vous admire et vous aime », tot aquò comentat dins una caravana sonorizada de Radio-Lengadòc-Narbona  per l’Alan Roch de la Trivala e pel Patrick Sebastian de Briva !! Aquò òc qu’auriá  bona mina ! e ramosariá de monde ! Mas benlèu que si se fa pas ongan (NDLR : e aquò se faguèt pas !), se poiriá organizar per l’an que ven ? Òu, lo cronicaire, , seriás partent ? Se òc, telefòna-me, farem mitat-mitat sus la recèpta. Amicalament. » Mon paure Miquèl, vèni de gaitar mon calendièr e vesi que l'an que ven (coma ongan) serà pas possible per ieu de prene part a aquesta iniciativa plan interessanta. Bigeard, avètz dit Bigeard, coma es Bigeard !

- Unas pensadas estivencas : Lo melon d'agost trapa la cartagèna a son gost. Lo solelh d'agost escaufura la pèl e amadura lo rasim. D'agost, de la tardor anóncia lo gost. 
Agostenc Roch 

PAPIERÒT MENERBÉS (in La Semaine du Minervois, 21/08/14 

Aucun commentaire:

Enregistrer un commentaire