Objet du blog

Ce blog présente principalement des articles sur les actualités concernant les religions, la spiritualité protestante, la culture et la langue occitanes, l'actualité personnelle et familiale. On peut aussi s'y trouver quelques billets d'humeur...

Aquel blòg presenta principalament d'articles sus las actualitats pertocant las religions, l'espiritualitat protestanta, la cultura e la lenga occitanas, l'actualitat personala e familiala. Se pòdon trobar qualques mots bilhetas d'umor...

samedi 9 janvier 2016

UN CÒP AL MORAL

Vaquí l'editorial de l'Alan PAPIERÒT MENERBÉS (in La Semaine du Minervois, 07/01/16)


UN CÒP AL MORAL

A la debuta de l'an, se desira de costuma la bona annada als amics e als collègas. Mas aquí sortissèm d'un an 2015 que nos daissa coma un pes sus l'estomac e de negre pel cap : entre la disparicion d'amics, l'afar de Charlie e de l'Iper-Casher, lo chaple del 13 de novembre... E, en subrepés, a la debuta de decembre, las resultas d'eleccions que marcan la pujada del Front nacional, la vesion d'aquelas cartas dins La Semaine du Minervois d'aqueles vilatges colorats de blau ont los marinièrs èran en cap al primièr o al segond torn. Provença que demòra a un partit democratic, mercé als sacrificis de l'esquèrra. La bèstia maurèla se fa de mai en mai bèla. Te trapas amb los vesins, los collègas, los cosins... qu'ara vòtan FN e de mai lo justifican per la volontat de tot cambiar. A las eleccions regionalas, se parlèt gaire de politicas regionalas e d'enjòcs territorials. Ja qu'èra malaisit amb lo pauc de poder autrejat a aquel escalon per l'Estat que demòra lo mèstre complet dels mejans financièrs.

De solucions, es pas lo Front que ne prepausa : sos discorses son contraris a son ideologia qu'es del genre que cadun se petace e de jogar sus las paurs e las exclusions. I a quicòm de fòrt de se reclamar d'una França crestiana e se trufar coma de l'an 40 (del temps de Vichei..) dels principis de basa de la religion : aimar totòm, respectar los paures e los estrangièrs,...
Quicòm de triste de veire tant e tant de monde pas utilizar lo mejan simple del bulletin de vòte ; triste de romegar sus d'elegits que fan pas, mas quna implicacion de cadun e caduna dins la vida collectiva : engatjaments associatius, sendicals, culturals, ... Res tomba pas rostit : se ba cal ganhar !

Bon, apuèi, sèm pas arribats quand se vei un ministre socialista explicar, a la vista de las resultas, qu'èsser socialista uèi es afavorir lo trabalh lo dimenge per totes ! Aquò's segur una avançada ideologica de primièra ! Los paures Verds se son amagats jos tres fuèlhas de caulet e, al moment ont la planeta parla d'arrestar de se rescaufar, elis an pres un brave còp de jalada !

Refrejament tanben per çò que concernís la question linguistica : avèm manifestat a Montpelhièr e, tres jorns apuèi, lo Senat declarèt qu'èra pas question de ratificar la Carta europèa. S'ausisson cridals aprèp las presas de paraulas en còrse dins l'Amassada de Corsega, alara que la co-oficialitat es estada demandada per quasi tota l'Amassada passada. Mas la democracia parisenca consistís a pas escotar los ciutadans ! Lo jacobinisme noirís dempuèi bèl brieu lo refús de la diversitat, lo refús dels autres e una surditat afortida e òrba !

Se va caler sarrar los coides per portar totjorn e encara los ideals de Paratge e de Convivéncia, del viure-ensemble, per pas se faire chapar totes cruses. Aurem encara mai de trabalh ongan que 2016 es de 366 jorns !

Neurastenic Roch

Plan mercés l'amic Alan! Te disiram una bona anda plan granada amb un fum d'editorials que nos regalan cada setmana. 

_______________
*

Aucun commentaire:

Enregistrer un commentaire