Objet du blog

Ce blog présente principalement des articles sur les actualités concernant les religions, la spiritualité protestante, la culture et la langue occitanes, l'actualité personnelle et familiale. On peut aussi s'y trouver quelques billets d'humeur...

Aquel blòg presenta principalament d'articles sus las actualitats pertocant las religions, l'espiritualitat protestanta, la cultura e la lenga occitanas, l'actualitat personala e familiala. Se pòdon trobar qualques mots bilhetas d'umor...

mercredi 17 février 2016

LOS SANTS DE GENIÈR


Avèm ja virada la pagina del mes de genièr del calendièr de 2016. I trapèrem dires neo-tradicionals (d'una autenticitat assegurada coma l'escapa de carbona d'un motor diesèl) que s'estacan als sants e santas que se festejan e que plan an tarriblament un costat uman. Atal, lo Senhor a tròp de vinhas, lo vin refofa dins las tinas, las messas arriban pas a l'escorrir. Alara, cal plan que qualqu'un se'n ocupe e veiretz que plan de sants e santas sabon levar lo coide.
Dins lo temps, se balhava als nenons lo pichon nom del sant o de la santa del jorn (a costat d'aquel dels papetas e mametas per assegurar la transmission intergeneracionala - o quicòm atal). La tradicion s'es perduda ; unes sants an bolegat de plaça ; mas la fèsta del jorn pòt balhar entresenhas sul devenir dels mainatges (enfins, i podètz creire coma a l'oroscòpi del jornal).
Anem, tornam prene de Cap d'an la fugida dels jorns (e de las nuèits tanben) : 1 : Lo Primièr de l'an es un brave fenhant. 2 : Plan fòl qual va a l'asili per la Sant-Basili. 3 : Per la Santa Genevièva, lo genèpi en barrica. 4 : A la Santa Angèla, cadun es pas un àngel. 5 : Per sant Edoard, dardeja lo solelh d'ivèrn. 6 : Als Reis, la còca ; al pòble, los crostets. 7 : A la Sant Ramond, la cantina d'aramon. 8 : Per Sant-Lucian, tot es ancian. 9 : A la Santa Aliça, es ora de dintrar en liça.10 : Per Sant-Guilhèm, totjorn sèm. 11 : A la Sant-Paulin, ages pas paur de tastar lo vin. 12 : Santa Tatiana càmbia de tatanas. 13 : Per la Santa Iveta, tropèl sens pastreta. 14 : Nina, Nina, cardelina ! 15 : Sant Remèsi s'amaga dins la remesa. 16 : A Sant-Marcèl, tot es vièlh. 17 : Per Santa Rosalina, mesfisa-te de las espinas. 18 : Sant Ciril es pas d'abril. 19 : Paure Marius : totjorn fanní a la petanca ! 20 : Per Sant Sebastian, mèfi al bastarròt. 21 : Santa Anhès, pèl d'anhèl. 22 : Per Sant Vincenç, un còp de vin ne val cent. 23 : Sant Barnard es pas plan bavard. 24 : Sant Francés de Salas se balha d'èrs. 25 : L'amistat de Sant Prètz a pas de prètz. 26 : Paula, Paulet e poletons tretze a la coada. 27 : Santa Angèla a tretze cordèlas. 28 : Sant Tomàs d'Aquin es plan sovent endacòm mai. 29 : Per Sant Gildàs, cal pas èstre las. 30 : A la Santa Martina, tres potons a la cantina. 31 : Santa Marcèla corrís coma una gasèla.
E l'afar, de segur, contunha en febrièr-lo-fenhant : 1 : Quand febrièr es de vint-e-nòu, tot es nòu. 2 : L'orsa rondina, los uèlhs dobèrts. 3 : A la Sant-Blasi, tot s'esglasís. 4 : Los pescajons de Candelosa passada son tròp salats. 5 : La gata d'Agata a gatat. 6 : Gastonet, as lo telefonilhet que tridòla. 7 : Eugenia es pas aicí : es als banhs. 8 : Se vei la Josefina al pè de la tina. 9 : Lo cap dins las estèlas, Apolina cèrca son Apolon. 10 : Escolastica, tres elasticas per una escòla. 11 : En òc, Eloïsa pèrd sa pigassa francimanda...
Efemerid Roch

PAPIERÒT MENERBÉS (in La Semaine du Minervois, 11/02/16)

Aucun commentaire:

Enregistrer un commentaire